Joriy mavsumda NBA Fanatics/Topps bilan hamkorlikda debyut medallari va oltin logotipli medallarni oʻz ichiga olgan yangi kolleksiya dasturlarini ishga tushirmoqda.
Endilikda har bir yangi oʻyinchi oʻz libosida NBA debyut medalini taqib yuradi. Ushbu medal oʻyindan soʻng ehtiyotkorlik bilan yechib olinib, noyob, imzoli yangi oʻyinchi kartasiga biriktiriladi. Xuddi shunday, 2024-25 yilgi mavsumning eng qimmatli oʻyinchisi (MVP), yilning eng yaxshi yangi oʻyinchisi va yilning eng yaxshi himoyachisi oʻz liboslarida maxsus oltin NBA Logoman medalini taqishadi. Bu oltin medallar ham yechib olinib, juda kam uchraydigan savdo kartalariga joylashtiriladi.
2024-25 yilgi mavsum uchun eng yuqori unvonlar Oklahoma City`dan Shai Gilgeous-Alexander (MVP), San Antonio`dan Stephon Castle (Yilning eng yaxshi yangi oʻyinchisi) va Cleveland`dan Evan Mobleyga (Yilning eng yaxshi himoyachisi) nasib etdi.
Fanatics Collectibles kompaniyasi bosh direktori Maykl Mahan ushbu tashabbuslarning ahamiyatini taʼkidladi. «LeBron Jeyms, Maykl Jordan yoki Stefen Karri kabi afsonalarning debyut medaliga ega boʻlish nimani anglatishini tasavvur qiling – kelajakdagi yulduzlar endi ana shunday noyob yangi oʻyinchi kartalariga ega boʻlishadi», dedi u. Mahan shuningdek, yangi yoʻnalishga eʼtibor qaratdi: «Savdo kartalari anʼanaviy ravishda yutuqlar va mukofotlar bilan bogʻlanmagan, ammo biz bu holatni oʻzgartirib, muvaffaqiyatlarni kartalar kolleksiyasiga kiritmoqdamiz».
Fanatics avvalroq beysbol (MLB) va futbol (MLS) ligalarida ham shunga oʻxshash debyut medali dasturlarini joriy qilgan edi.
THINK450 (NBPA litsenziyalash boʻlimi) bosh tijorat direktori Josh Goodstadt bu tashabbus sababini tushuntirdi: «Topps kompaniyasining MLB debyut medallari bilan erishgan muvaffaqiyatini koʻrib, biz ham basketbolga shunga oʻxshash gʻoyani kiritishni istadik. Ushbu debyut va oltin logotipli kartalar voqealarni hikoya qilishni sezilarli darajada yaxshilaydi va muxlislarning sport va oʻyinchilarimiz bilan muloqotini kuchaytiradi».
Mahan, shuningdek, Fanatics ushbu qimmatbaho medallarning haqiqiyligini taʼminlash uchun taniqli baholovchi va autentifikator Certified Guaranty Company (CGC) bilan hamkorlik qilayotganini tasdiqladi.
2024 yil boshida Fanatics LeBron Jeyms bilan muhim shartnoma imzoladi. Maykl Jordan singari, Jeyms ham bu yangi kelishuvdan oldin butun faoliyati davomida Upper Deck bilan uzoq muddatli hamkorlik qilgan edi.
Mahan bu yangilikdan gʻayratini bildirib, shunday dedi: «Kolleksionerlar LeBronning rasmiy litsenziyali kartalaridagi imzolariga ega boʻlishdan juda xursand boʻlishadi».
Mahan kelajakda LeBron Jeymsga bagʻishlangan xotira buyumlari rejalari haqida maʼlum qildi. U, shuningdek, oʻtmishdagi va hozirgi NBA yulduzlarining yutuqlarini nishonlaydigan, ligadagi «haqiqiy muvaffaqiyatlarni hurmat qilish»ga qaratilgan yangi kolleksiyalar haqida ham gapirdi.
Mahan muhim marralarni nishonlashga misol tariqasida, Los-Anjeles Dodgers jamoasi pitcherlari Kleyton Kershou yaqinda 3000 martalik kareradagi zarbasiga erishganida Topps tomonidan qilingan eʼtirofni keltirdi.
U batafsil tushuntirdi: «Biz Kershou va 3000 zarba bergan boshqa barcha nufuzli klub aʼzolari uchun noyob imzoli kartalar yaratdik.» Mahan buni basketbolga bogʻladi: «Basketbolda kutilayotgan muhim marralar, masalan, oʻyinchilarning toʻp kiritish reytingida yuqoriga koʻtarilishi haqida oʻylab koʻring. Biz sportning boy tarixini hurmat qilishni maqsad qilganmiz, kolleksionerlarga oʻyinchi debyutidan tortib, maydondagi soʻnggi qadamlarigacha boʻlgan muhim lahzalarning aniq bir qismiga ega boʻlish imkoniyatini beramiz».
