Amaldagi Yevropa chempionlari afrikalik raqiblarini ustunlik bilan yengib, turnirdagi dastlabki uch ochkoni qo‘lga kiritdilar.
Bugun, yakshanba kuni amaldagi chempion Italiya Filippinda bo‘lib o‘tayotgan Voleybol bo‘yicha FIVB erkaklar o‘rtasidagi Jahon chempionati unvonini himoya qilish yo‘lida birinchi muhim qadamni tashladi. Jamoa 2022-yilda qo‘lga kiritgan chempionlik unvonini bu yilgi turnirda muvaffaqiyatli himoya qilishni maqsad qilgan.
Quezon Siti shahridagi Smart Araneta Kolizeyida “F” guruhi doirasidagi ilk oʻyinida italiyaliklar Jazoirga qarshi maydonga tushdi va 3:0 (25-13, 25-22, 25-17) hisobida ishonchli gʻalaba qozondi. Bu gʻalaba ularga turnirdagi dastlabki uch ochkoni taqdim etdi.
Shu kuni «F» guruhining boshqa oʻyinida Belgiya terma jamoasi Ukrainani 3:0 (25-16, 25-17, 25-22) hisobida magʻlub etdi. Natijada, Italiya va Belgiya uch ochkodan jamgʻarib, guruh peshqadamligini boʻlishmoqda. Guruhdagi eng yaxshi ikki jamoa 1/8 finalga yoʻl oladi.
Italiyaning hujumida asosiy oʻyinchilardan Alessandro Michieletto 15 ochko (toʻqqizta hujum zarbasi, toʻrtta eys, ikkita blok) bilan eng samarali oʻyinchi boʻldi. Mattia Bottolo esa 13 ochko (oʻn bitta hujum zarbasi, ikkita eys) toʻpladi. Yuri Romanò ham oʻn ochlik chegarasidan oʻtib, oʻnta hujum zarbasi va bitta eys bilan 11 ochkoni oʻz hisobiga yozdi.
«Jahon chempionatidagi har bir jamoa juda kuchli,» dedi Michieletto. «Biz juda chiroyli o`yinlarni kuzatdik va saviya juda yuqori. Bizning guruhimiz ham juda kuchli va finalga yo`l olishimiz ancha qiyin bo`lishi kutilmoqda, ammo bizda kuchli jamoa bor va qo`limizdan kelgancha harakat qilamiz. Biz diqqatimizni yo`qotmasligimiz kerak, chunki bu yerda bir nechta o`yin har qanday natijani o`zgartirishi mumkin.»
1998-yildan beri birinchi marta Jahon chempionatiga qaytgan Jazoir terma jamoasida Sidi Dour 11 ochko (oʻnta hujum zarbasi, bitta blok) bilan jamoani yetakladi, Boudjemaa Ikken esa sakkizta hujum zarbasi va ikkita blok bilan 10 ochkoni qayd etdi.
«Biz uzoq vaqtdan keyin bu darajaga qaytdik,» dedi jamoa sardori Soufiane Hosni. «Biz bu yerga bor kuchimizni berish uchun keldik va barcha jamoadoshlarimga tinimsiz mehnati uchun minnatdorchilik bildiraman. Ishonamanki, biz bugungidan yaxshiroq oʻyin koʻrsata olamiz. Biz eng yaxshi oʻyinimizni koʻrsatishga biroz uyaldik, ammo keyingi oʻyinimizda koʻproq harakat qilamiz.»
Italiyaning oson gʻalabasi statistikada ham oʻz aksini topdi. Yevropaliklar raqiblaridan hujum zarbalarida (39 ga 32), bloklarda (sakkizga uch) va eyslarda (yettiga nol) ustun kelishdi, shuningdek, kamroq xatolarga (17 ga 21) yoʻl qoʻyishdi.
Keyingi o`yinlar
“F” guruhining toʻrtta jamoasi seshanba kuni yana maydonga tushadi. Ukraina Jazoirga qarshi mahalliy vaqt bilan soat 14:00 da (GMT 6:00), Italiya esa Belgiya bilan mahalliy vaqt bilan soat 21:30 da (GMT 13:30) ikkinchi tur oʻyinlarini oʻtkazadi.
