O'zbek sportida 19 yoshida tarix yoza olgan Ulug'bek Rashidov kim? (+video)

Ulug'bek 2002 yil 23 mart sanasida Toshkent shahrida tug'ilgan. 5 yoshidan taekvondo bilan shug'ullanib keladi. E'tiborli jihati, Ulug'bek 14 yil davomida faqat bir murabbiy — Pavel Xan qo'l ostida shug'ullanib kelgan. Shuningdek, u futbolga qiziqqan. Dadasi hatto “Paxtakor” klubi akademiyasiga olib borgan. Akademiyadagilar ilk ko'rikdayoq uni olib qolishga rozi bo'lgan. Biroq murabbiy Pavel Xan uni taekvondoda olib qolish imkonini topgan. Murabbiy Ulug'bekning dadasiga shunday degan: “Siz mening yuragimni olib qo'yyapsiz”. Bu gap Ulug'bekning dadasiga qattiq ta'sir qiladi va u taekvondoda qoladi.

Ulug'bek 2018 yilda Buenos-Ayresda (Argentina) bo'lib o'tgan o'smirlar o'rtasidagi yozgi Olimpiya o'yinlarida 48 kilogrammgacha vazn toifasida kumush medalini qo'lga kiritgan.

2019 yilda esa o'smirlar o'rtasidagi Osiyo chempionatida 55 kilogrammgacha vazn toifasida oltin medalga ega chiqqan. Xuddi shu yili u Butunjahon armiya o'yinlarida 58 kilogrammgacha vazn toifasida oltin medalni qo'lga kiritadi.

Bugun 19 yoshli yigit o'zbek taekvondosi tarixida ilk bor yozgi Olimpiada o'yinlarida oltin medalga ega chiqdi.

Eslab qoling, bu ism-sharifni — Ulug'bek Rashidov. U o'zbek sportida o'ziga xos tarix yozdi.

Do'stlaringizga bilan baham ko'ring