Osiyo futboli yulduzlari: Suyukli, mergan va yaxshi yigit

SON XYuN MINNING ChO'QQI SARI YO'LI.

Nafaqat Janubiy Koreya, balki butun Osiyo futbolining bugungi bosh yulduzi faoliyati barchaga namuna qilib ko'rsatishga arziydi. 2020 yilning bahori. Jeju oroli. Moseulpo shahri. Sochini qirtishlab olib tashlagan bir yigit «M16» avtomati bilan mo'ljalni nishonga olmoqda. Naq 70 yil muqaddam uning vatandoshlari xuddi shu bazada shug'ullanib, tarixda o'ta muhim ahamiyat kasb etgan Koreya urushiga tayyorgarlik ko'rishgan. KXDR qo'shini 1950 yili Xitoy va sobiq ittifoqi ko'magi bilan Koreya yarim oroli bo'ylab janub tomon harakatlanib, mamlakatning materik qismini deyarli bosib oldi, faqat kichikkina hudud qoldi. 80 mil janubroqdagi vulqonli Jeju oroli Janubiy Koreya armiyasi chekingan joylardan biri edi. Keyinchalik harbiy kuch u yerdan Seulning g'arb tomoni – Inchxon shahriga suzib borib, Angliya va AQSh armiyasiga qo'shildi. Shu tariqa katta mojaro yo'nalishini butunlay o'zgartirgan jang boshlandi. Bu urush yakunda zamonaviy Janubiy Koreya yo'lini ochdi…

***

Qo'lida avtomat bilan o'tirgan haligi «yaltiroq» boshli yigit Janubiy Koreya futbolining eng porloq yulduzlaridan biri bo'lib, u ko'plab o'tmishdoshlari kabi Vatan oldidagi burchini ado etish uchun Chejuga kelgandi. APL yulduziga aylanib ulgurgan Son Xyun Min armiya an'anasiga muvofiq, sochini butunlay oldirib tashladi. Angliya klublari darvozabonlarini zir qaqshatishga o'rgangan futbol mergani bazada to'pponchadan o'q otishni o'rgandi, 30 kilometr masofani o'z ichiga olgan marshda yugurdi, kimyoviy qurolga qarshi kurashga qaratilgan mashg'ulotlarda ko'zni achishtiruvchi gaz «ta'm»ini tatib ko'rdi. Aytish o'rinli, Janubiy Koreyada Son Xyunning harbiy xizmatga jalb etish masalasi ko'p yillar davomida rosa muhokama qilingan edi. Biroq futbolchining aynan qachon armiyaga safarbar etishlari va uning qancha muddat askar maqomida yurishi ma'lum emasdi. Agar harbiy o'quv-mashg'ulotlar mamlakat qonunchiligida ko'rsatilganidek, 21 oyga cho'zilsa, Son Xyun Minning butun futbolchilik faoliyati tahdid ostida qolardi. Hujumchining o'zi ham buni juda yaxshi tushunardi.

***

Amalda «Tottenxem» Angliyada o'rnatilgan karantin tartibidan chiqishga tayyorlanayotgan payt Son Xyun Min harbiy burchini bajarishga ulgurdi. Aynan shu majburiyat uning APL vakili sifatida yanada rivojlanishiga rahna soluvchi yagona potensial to'siq sanalardi. Real to'siq yo'ldan olib tashlangach, Son Xyun bor e'tiborini faqat va faqat futbolga qaratish imkoniyatini hosil qildi. Xullas, futbol uning asosiy tashvishiga aylandi-qo'ydi. Koreys yigiti shunday keyingi 9 oy ichida faoliyatidagi eng yorqin o'yinlarni namoyish etib, zamonaviy futbolda eng yaxshi ijrochilar qatorida ekanligini to'liq isbotladi.

***

Son Xyun Min armiya safariga otlanishdan oldin otasi bilan 4 soatlik mashaqqatli mashg'ulotlarni eslagandir… Hujumchi bar­qaror taraqqiyotining aksariyat qismi uchun otasidan qarzdor. Son Xyunga bolaligidan kuchli mentalitetni singdirgan shaxs – bu aynan Son Un Jun. Ba'zi muxlislar unga hozir ham «Son Xyun Minning otasi» qabilida murojaat qilishadi. Uning o'zi vaqtida Janubiy Koreya klublarida hujumchi sifatida to'p surgan, ammo jarohat ortidan 28 yoshidayoq sportchilik faoliyatiga nuqta qo'yishiga to'g'ri kelgan. Son Xyun Min shundan 2 yil o'tib tug'ilgan va Seulning shimoli-sharqidan 50 mil uzoqlikdagi Chuncheon shahrida akasi bilan birga ul­g'aygan. Ularning har ikkisi futbolni tanlaydi. Son Un Jun o'sha vaqtdayoq o'g'illariga texnik ko'nikmalarni puxta egallash muvaffaqiyat sari boshlashini alohida uqtiradi. Umuman, u farzandlari bilan qat'iy rejimda alohida shug'ullanadi, talabchanlikni ham o'rniga qo'yadi. Keyinchalik aka-ukalar har kuni mashg'ulotlar bazasiga loyli dala orqali yugurib borish asnosida jismonan chiniqishga erishadilar. Katta Son uslublaridan biriga ko'ra, Xyun Min uch aylana tarzda to'p bilan jonglyor mashqini bajarishi kerak edi – avval chap, so'ngra o'ng oyog'i, yakunda har ikkisi bilan. Bordiyu, belgilangan vaqtda to'pni yerga tushirib yuborsa, mashqni boshidan qayta bajarishiga to'g'ri kelardi. Son Xyun otasi vajohatidan cho'chib, hech qachon unga itoatsizlik qilishga jur'at etmagan. O'zining aytishicha, bolaligida bir safar mashg'ulot payti biroz injiqlik qilganida, otasi yo'lda o'tib ketayotgan politsiyachini chaqirib, uni rosa qo'rqitgan ekan.

***

Aka-uka bir gal uyda nomiga janjallashib qoladilar. Shunda oila boshlig'i bunga javoban o'g'illarini alohida jazo chorasi bilan «siylaydi». «Otam bizni naq 4 soat davomida tinmay mashaqqatli mashqlar bajarishga majburlagandi, – deya eslaydi Son Xyun 10 yoshida yuz bergan o'sha voqeani. – Chamasi 2 soatdan keyin ko'zimga faqat pol va 3ta to'p ko'ringani yodimda, vaholanki, u bitta edi…». Aytish joiz, Min jonglyor mashqida to'pni hech qachon yerga tushirib yubormasdi: «Bu diqqatni jamlash vositasidir». Turli ekstremal tayyorgarlik usullari o'z samarasini beradi – Son Xyunni ma'lum vaqtdan keyin «Seul FK» akademiyasiga qabul qilishadi. Qolaversa, uni ko'p o'tmay, Janubiy Koreya U-15 terma jamoasiga ham jalb eta boshlashadi. «Aslida u bu yosh toifasidagi eng yaxshi futbolchilardan biri sanalmasdi, lekin birinchi mashg'ulotdayoq to'p bilan ishlash ko'nikmasidan shunchaki, lol qolgandim: «Oh… Nega shu paytgacha bu yigit haqida hech gap eshitmadim?» – bu Son Xyun bilan aynan U-15 termasida birga shug'ullangan va keyinchalik kibersport yulduziga aylangan Von Chan Yon taassurotlari. U davom etadi: «Shunchaki, qoyilmaqom yigit. O'sha ilk kungi mashg'ulotdan yana bir jihatni aniq eslayman – Xyun Min ikki oyog'i bilan birdek aniq va kuchli zarba yo'llashi bilan ko'pchilikni lol qoldirgandi. Uning zarbalaridan birini to'sishga urindim, lekin shunchaki, muvozanatni yo'qotdim, chunki dahshatli kuch kelib tushdi. Vaholanki, ozg'ingina yigit edi, to'g'ri, sonlari massaga to'la ekanligi shundoq ko'zga tashlanib turardi. Eng asosiysi, Son Xyun boshqalarga nisbatan ancha ko'p ishlardi».

***

Og'ir kelgan birinchi mavsum. Maurisio Pochettino «Sautgempton»ni boshqargan vaqtda Son Xyunni tarkibga qo'shishga uringan, ammo nimadir o'xshamagan. Argentinalik mutaxassis keyinchalik «Tottenxem» bosh murabbiyi rolidagi ikkinchi davri boshida koreys yigitini tarkibga qo'shib, niyatiga yetdi. Ko'p o'tmay, Son Xyun London klubida yangi yaqin do'st kashf etdi. «Birinchi kundan o'rtamizda o'zgacha munosabat shakllandi, chunki ikkimiz nemis tilida gaplasha olardik, – deya tushuntirgandi atigi 3 oy oldin «Kyoln»dan «Tottenxem» safiga o'tgan avstriyalik himoyachi Kevin Vimmer. – Son Xyun ingliz tilini uncha yaxshi tushunmasdi, gapirolmasdi. To'g'ri, haftasiga 3 marta kursga qatnab, bu kamchiligini tezda bartaraf etishga erishdi. Muhimi, boshida men bilan nemis tilida muloqot qilishi mumkinligidan mamnun edi va ikkimiz ko'p vaqt birga bo'lardik. Deylik, mashg'ulotlardan keyin sport zali yoki basseynga borardik. Ba'zida shunchaki, mashg'ulotlar bazasida qolib, PlayStation qurilmasida o'yinga sho'ng'irdik. Bunda ko'pincha FIFA ilovasini tanlardik. Shuningdek, oziq-ovqat mahsulotlari xaridiga ham birga chiqardik, yana boshqa jamoadagi futbolchilar bilan aloqa o'rnatishga imkon beruvchi alohida WhatsApp guruhi ochgandik. Bu orqali uyda turib, Call of Duty o'yini bo'yicha bahs­lashardik. Qisqasi, yaqin do'stlarga aylandik va shundayligicha qolamiz. Hozir ham telefon yoki FaceTime orqali ko'p gaplashamiz. Juda sodda yigit. Kiyinish xonasida alohida ajralib turishga intilmasdi, muhimi, «Tottenxem» o'yini va muhitiga to'liq moslashish uchun ko'p vaqt sarflamadi. Chunki Son Xyun hammaga yoqadigan xarakterga ega yigit. Deylik, bir qarashda sizga yaxshi kayfiyat bag'ishlashi mumkin, binobarin, samimiy tabassumi hech yo'qolmaydi. Shuning barobarida maydonda o'ta jiddiylashadi. Lekin ko'ngilxushlik qiladigan joyda hammaga ijobiy energiya bera oladi. Agar Son Xyun bilan birga bo'lsangiz, kulish uchun hamisha mavzu topiladi. Qisqasi, u nafaqat futbolchi sifatida muhim, balki jamoa personajidir».

***

Umuman, koreyalik yigit Angliya­da hamma bilan tezda chiqishib ketadi. Mana, «shporlar»ning sobiq yarim himoyachisi, yakunlangan mavsum jamoani boshqargan Rayan Meyson xotiralariga e'tibor qarating: «Son Xyun professional futbolchi sifatida barcha mezonlarga to'liq javob beradi. Xususan, mashg'ulotlarda hamma u bilan ishlashni xohlaydi. Chunki jarayonda rohatlanishni ham o'rniga qo'yadi. O'zi tinmay shug'ullanadi. Koreys yigitining mashg'ulotlarga salbiy yondashgani haqida hech qachon eshitmaysiz, chunki u katta professional. Garchi Janubiy Koreya va Osiyo futbolida Devid Bekxem darajasiga chiqqan bo'lsada, kamtarlikni saqlab qolgan. Yana bir tomoni, Son Xyun «Tottenxem» bilan shart­noma tuzganidan keyin Janubiy koreyalik muxlislarda jamoamizga nisbatan e'tibor keskin ortdi. Ishonchim komil, ulardan ayrimlari ilk kundan Angliya tomon chipta olishni boshlaganlar! Har holda, koreyaliklar hattoki, mashg'ulotlarimizni ham bevosita kuzatishga odatlanishdi. Ularni maydon chetida ko'rish yoqimli. Xoh yomg'ir, xoh shamol bo'lsin, Son Xyunning personal fanatlari biz bilan birga. Qisqasi, ob-havo qandayligidan qat'iy nazar, koreyalik muxlislar guruhi har joyda Son Xyunni iliq kutib olishadi».  Son Xyun Min APLga yo'l olgach, Janubiy Koreya nashrlari jurnalistlari ham Angliya tomon yopirilishdi. «Tottenxem»ning har bir o'yinida kamida 5 kishi ishlaymiz, ba'zan koreyalik jurnalistlar soni 10 nafarga ham yetadi, – deydi  futbolchining faoliyatini Sports Seoul va Naver nashrlarida alohida yorita boshlagan Li Sun Mo. – Aksariyat o'yinlardan keyin undan intervyu olamiz. E'tiborli tomoni, Son Xyun vaqt tig'izligiga qaramay, Janubiy Koreya OAV vakillari iltimoslarini biror marta rad etmaydi. Albatta, buning uchun undan bag'oyat minnatdormiz».

***

Son Xyun Minning Angliyadagi birinchi mavsumidayoq yorqin voqea­lar kuzatildi. Misol uchun, koreys futbolchisi «Tottenxem» libosidagi dastlabki ikki uy uchrashuvidan birida «Qorabog'» darvozasini ikki bora nishonga oldi (Evropa Ligasi o'yinida). Ammo tezkor futbolchi chempionat doirasida «shporlar»ning boshlang'ich tarkibiga atigi 13 marta kirdi va elitada 4tagina gol urish bilan cheklandi. «Tottenxem» o'sha mavsum «Lester» qatori chempionlikka da'vogarlik qildi. Shuni hisobga olsak, yangi futbolchining Ang­liyadagi o'yinlarga tezda moslashib, asosiy tarkibdan joy olishi qiyin masala edi. «Esimda, Son Xyun yanvar yoki fevral oyida juda kam vaqt o'ynagan va «Tottenxem»dagi keyingi faoliyati so'roq ostida qolgandi – futbolchi uchun Angliyada eng og'ir damlar, – deydi Li Sun Mo. – Hattoki, biz – jurnalistlar ham xavotirga tushgan va vaziyat ijobiy tomonga o'zgarishi ilinjida keyingi turni intiq holda kutardik. Shaxsan men har bir uchrashuvdan keyin uning yo'liga peshvoz chiqardim – turli savollar berish emas, balki shunchaki, ko'nglini ko'tarish, Janubiy Koreya fuqarosi sifatida mamlakatimizda hech kim mahoratiga shubha qilmasligini bildirish uchun. Xyun Min oldimdan o'tib ketayotganida, shunchaki, «Yaxshimisan, hammasi joyidami?» – deb so'rardim. Shunda jilmayib xotirjam javob berardi: «Xavotir olmang, yaxshi, muammo yo'q». Qisqasi, demoqchimanki, Son Xyun eng qiyin davrda ham o'ziga qattiq ishongan. Buni ko'rgach, beixtiyor o'zimga pichirlardim: «Bu yigit hali o'zini ko'rsatadi, albatta». U o'sha vaqt maydondan tashqarida ancha uyatchan, yumshoqko'ngil yigit edi, lekin o'z salohiyatiga aslo shubha qilmagan. Son Xyun doimo shunday xarakteri bilan ajralib turgan». Shu qat'iy ishonch mavsumning oxirgi kuni sinovdan o'tkaziladi. O'shanda «Tottenxem» kamtarin «Nyukasl»ga 1:5 hisobida imkoniyatni boy berib, turnir jadvalida 3-o'ringa tushib qolgandi. Son Xyun tanaffus payti zaxira vakili bilan almashtiriladi va u yozda APLdan voz kechish haqida jiddiy o'ylay boshlaydi. Chunki «Volfsburg» koreys yigitini Germaniyaga qaytarishga tayyor turgandi…

SON XYuN MINNING ChO'QQI SARI YO'LI. Gazetamizning avvalgi seshanba sonida nafaqat Janubiy Koreya, balki butun Osiyo futbolining bugungi bosh yulduzi faoliyatiga bag'ishlangan katta maqola bergandik. Buning Son Xyun Minning futboldagi yo'lida kuzatilgan «qalin» chizgilar bilan tanishishda davom etamiz.

***

Maurisio Pochettino samimiy suhbat asnosida Son Xyun Minni «Uayt Xart Leyn»da qolishga ko'ndirdi. «Aslida u APLda o'ynashni orzu qilar va qolishni xohlardi, ammo menejerning koreys yigiti bilan gaplashib, salohiyatiga shubha qilmasligini bildirishi muhim edi. Xullas, Pochettino bilan suhbatdan ke­yin Son Xyun jamoaga kerak ekanligini qalban his qildi», – deydi «shporlar» safida ma'lum muddat o'ynagan Kevin Vimmer.

***

«Gamburg»ning topqirligi hurmatga sazovor. Son Xyun 2008 yili 16 yoshli umidli o'smir sifatida J.Koreya futbol federatsiyasi yoshlar loyihasi doirasida bir mavsum Germaniyada o'ynash imkoniyatiga ega bo'ldi. U bilan birga Kim Min Xyuk va Kim Chen Pil ham «Gamburg» tizimiga qo'shilishdi. Aytishlaricha, Son Xyun tanasini to'g'ri parvarishlash uchun hamisha sog'lom turmush tarziga amal qilgan, deylik, har kuni kechqurun erta yotardi. Umuman, Kim Chen Pilning ta'kidlashicha, hattoki, tartibni birinchi o'ringa qo'yadigan nemislar ham uning kun rejimidan sira og'ishmasligi va futbolga sadoqatidan hayratlanishgan. Son Xyunning ikki vatandosh do'sti 1 yildan keyin ortga qaytadi. To'g'ri, «Gamburg» qahramonimizga ham avvaliga shartnoma taklif qilmagan, shuning uchun u Yevropada qolish ilinjida «Blekbern» va «Portsmut» klublari bilan muzokara olib boradi. Faqat birdaniga ingliz futboliga bosh suqishga botinolmaydi. «Gap shundaki, ingliz tilida biror so'z bilmasdim, yolg'izlik ortidan o'zimni ko'rsatolmasligimni o'ylab, APL variantidan bosh tortdim. Umuman olganda, Angliya futboli haqidagi ilk taassurotlarim ham yaxshi emasdi», – deya tushintirgandi Son Xyunning o'zi keyinchalik.

***

Son Xyun Min oradan ko'p o'tmay, U-17 toifasidagi JChga boradi va mundialda 3ta gol urib, yorqin taassurot uyg'otadi. Qolaversa, koreyalik o'smirlar Nigeriyada chorak finalga yo'l olishadi. «Gamburg» shuning ta'sirida o'z fikrini o'zgartirib, Son Xyunga shart­noma taklif qiladi. Shu tariqa futbolchi APLda o'ynash fikridan batamom voz kechib, Germa­-niya­ga qaytadi va  SpongeBob SquarePants tomoshasi orqali nemis tilini o'rganishga astoydil kirishadi. Son Xyun 18 yoshga to'lganidan atigi 1 oy o'tgach, «Gamburg» mavsumoldi yig'inida, 47000 muxlis qarshisida APL chempioni – «Chelsi»ga qarshi o'ynaydi. Koreys yigiti o'sha «o'rtoqlik»da 34 yoshli Ruud van Nistelroy o'rniga zaxiradan maydonga tushib, kimsan Jon Terriga kuchli bosim o'tkazadi va tajribali himoya­chini xato qilishga majburlaydi, keyin Rikardu Karvalyuni chalg'itgancha darvoza tomon aniq zarba yo'llaydi. Qisqasi, bir harakat bilan dunyoning ikki eng yaxshi markaziy himoyachisini ahmoq qiladi. «Ilk kundan uning ko'plab yaxshi sifatlarga egaligini ko'rdik, — deya xotirlaydi o'sha vaqt «Gamburg»da o'ynagan braziliyalik sobiq yulduz Ze Roberto. – Birinchi navbatda, yigitchaning jarima maydoni tashqarisidan ham chiroyligina zarba berish qobiliyati e'tiborimni tortdi. U yana mashg'ulotlardan keyin maydonda qolib, van Nistelroy bilan zarba yo'llash ustida alohida ishlardi. Ikkisi har doim birga shug'ullanar va hattoki, kim ko'p gol urishi borasida o'zaro bahslashardi ham. Bunda mashg'ulot payti kim kam gol ursa, mag'lub sifatida kechki tamaddi vaqti g'olibga xizmat qilardi. Umuman, Son Xyun yakka tartibda juda ko'p ishlardi. U kabi kuchli mentalitetga ega yosh futbolchilarni kam ko'rganman. Son doimo o'rganish va o'yinini takomillashtirishga tayyor turardi. Bu bilan chindan ham, diqqatimni tortdi. Osiyolik futbolchilar ko'pincha texnik salohiyatlari bilan ajralib turishgan, ammo jismoniy tomondan uncha maqtanolmasdilar. Son Xyunda esa texnika ham, jismoniy jihat ham joyida edi, qolaversa, o'yinni yaxshi tushunardi. Qisqasi, yigitchani oldinda katta kelajak kutayotganini payqash qiyin emasdi. Zero, unda futbol fenomeniga aylanish uchun hammasi mujassam edi».

***

Son Xyun 2010 yili Bundesligada debyut qildi va «Gamburg» tarixida chempionat o'yinida gol urgan eng yosh futbolchi bo'ldi. U o'shanda «Kyoln» darvozasini nishonga olgandi. «Son «Gamburg» safidagi debyut golini urganidan keyin Janubiy Koreyaning har bir fuqarosi mamlakat futbolining yangi yulduzi bosh ko'tara boshlaganini his qilgandi, – deydi jurnalist Li Sun Mo. – Chunki o'sha vaqtda «MYu» safidagi Park Ji Sunning o'yinida pasayish kuzatilayotgan va Janubiy koreyaliklar uning o'rnini bosadigan yangi yulduzga ehtiyoj sezayotgandilar. Sonning Bundesligadagi fantastik debyut goli ayni shu vaqtga to'g'ri keldi».

***

Son Xyun 2011 yilning yanvar oyida o'tkazilgan Osiyo kubogida Janubiy Koreya milliy jamoasi tarkibiga kitiriladi, biroq Qatarda zaxira o'yinchisi rolini bajarish bilan cheklanadi. Futbolchi Gamburgga qaytganidan so'ng ham negadir avvalgidek yaxshi o'ynolmaydi. Otasi buni Osiyo kubogi davrida uning ovqatlanish tartibi biroz buzilgani bilan izohlaydi. Oqibatda Son Xyun butun yozgi tanaffus payti maksimal jismoniy holatga kirish yo'lida kuniga 3 mahal qat'iy tartibda mashg'ulot o'tkazadi. U jumladan, otasi talabi bilan har kuni 1000 marta zarba yo'llaydi. 2012-2013 yillarda Son Xyun yoniga Germaniya beshinchi divizionda o'ynagan, ammo keyinchalik futbolni yig'ishtirib, Chxunxondagi oilaviy akademiyada ish boshlagan akasi qo'shiladi. «Katta o'g'limda yaqqol iste'dodi yo'q edi» – bu qattiqqo'l otaning to'g'ri va qat'iy bahosi.

***

Keyinchalik boshqa klublar Son Xyun Minga e'tibor qarata boshladi. Xabarlarga qaraganda, «Tottenxem» ma'lum vaqt futbolchiga asosiy da'vogar sifatida gavdalangan, bundan tashqari, «MYu» va «Chelsi» tomonidan qiziqish bor edi. Shuningdek, o'sha vaqt «Sautgempton»ni boshqargan Maurisio Pochettino ham koreys yigitiga befarq qaramagan. Biroq Son Xyunning o'zi Germaniyada qolishni afzal bilib, «Borussiya» D. va «Bayer»dan tushgan takliflarni o'rganib chiqadi. U yakunda o'tgan asrning 80-yillari Leverkuzenda o'ynagan Janubiy Koreya futboli afsonasi Cha Bum Kun izidan boradi. E'tiborli tomoni, shundan ko'p o'tmay, Son aynan «Gamburg»ga qarshi bahsda Bundesligada birinchi marta «xet-trik»ka erishadi. «Jamoamiz 5:3 hisobida g'alaba qozondi, Son Xyunning biz uchun juda tezkor ekanligi yaqqol sezilib qoldi, – deb eslaydi «Bayer»­ning sobiq futbolchisi, hozirda klub sport direktori Simon Rolfes. – Uning katta potensialga ega yaxshi futbolchi ekanligiga shubha qolmagandi. Yarim himoyachi sifatida uning tezligidan unumli foydalanish uchun ko'pincha to'g'ri uzatmalar berishga harakat qilardim. Son Xyun chap tomondan olg'a borib, birdan o'ng tarafga og'ib, darvozaga kuchli zarba yo'llardi. Bilaman, u buning ustida haddan ortiq ko'p mashq qilgan».

Koreyalik yigit «Bayer» safidagi birinchi mavsumda 12ta gol uradi, keyingisida esa raqiblar darvozasini 17 marta nishonga oladi. Shundan so'ng, 2015 yilning yozida «Tottenxem» uning transferini 22 million funtga sotib oladi.

***

Diqqat. Son Xyun yig'layapti. Koreyalik futbolchi Angliyadagi ikkinchi mavsumga kirishishdan oldin Belu-Orizontida, maydon o'rtasida umidsiz o'tirgancha yig'lardi, ko'z yoshi yuzidan oqardi. 2 yilcha avval Braziliya termasi nemislarga 1:7 hisobida yutqazgan bo'lsa, Janubiy koreyaliklar Olimpiada chorak finalida kamtarin Gonduras jamoasiga yagona gol tufayli o'yinni boy berishadi. Vaqt o'tgan sayin harbiy xizmat ham tobora yaqinlashardi. Janubiy Koreya hukumati hamon qo'shnilar bilan texnik jihatdan urush olib bormoqda va mamlakatning har bir erkak fuqarosi uchun harbiy tayyorgarlik majburiy bo'lib qolmoqda. Armiya majburiyati 28 yoshdan boshlanishi shart. Harbiy xizmat esa 21 oy davom etadi – bu futbolchilik faoliyatining eng muhim pallasida turgan Son Xyunga jiddiy muammo edi. To'g'ri, ilgari xal­qaro darajada katta muvaffaqiyatlarga erishgan fuqarolarga imtiyozlar berilardi. Misol uchun, Park Ji Sun Janubiy Koreya termasining 2002 yilgi jahon chempionatiga chiqishiga yordam bergani ortidan tezkor harbiy kurs bilan qutulgan bo'lsa, «Nyukasl»da o'ynagan yarim himoyachi Ki Son Yun 2012 yili Olimpiada o'yinlarida medal yutgani evaziga xuddi shunday imtiyoz olgandi. Son Xyun esa Janubiy Koreya termasi bilan Osiyo o'yinlari-2014da g'olib chiqish evaziga murakab to'siqni olib tashlashga umid bog'lagandi, biroq «Bayer» uni mavsum davomida qo'yib yuborishni istamadi. Shu nazarda tutsak, Olimpiada-2016 28 yoshga yaqinlashib qolgan futbolchi uchun yana bir imkoniyat edi. Biroq o'xshamadi… Muhimi, futbolchi faoliyatining muhim pallasida 2 yillik yo'qotish ayanchli oqibatlarga olib kelishi mumkinligini teran tushunardi, ammo bu vaziyat haqida omma oldida gapirishni umuman istamasdi. «Janubiy Koreyada harbiy masala mavzusi juda qat'iy, – deya izohlaydi Li Sun Mo. – Ko'plab muxlislar hukumatdan istisno tariqasida Son Xyunni harbiy majburiyatlardan ozod etishni so'rashdi, ammo bunga qarshi chiqqanlar ham topildi. Natijada o'rtada tortishuv ham yuzaga keldi». Qisqasi, Son Xyunning Braziliyadagi omadsizlikdan umidsiz holga tushgani aynan shu masalaga bog'liq edi. To'g'ri, bu u o'z yurti uchun yig'lagan birinchi holat sanalmaydi, oxirgisi ham. Deylik, Son Xyun koreyslar Osiyo chempionati-2011da yaponlarga penaltilar seriyasida yengilganlari va 2014 yilgi JChdan chiqib ketishganidan keyin ham ko'z yoshi to'kkandi. Qahramonimiz JCh-2018da ham xuddi shunday holatga tushgan, o'shanda Janubiy Koreya prezidenti hattoki, kiyinish xonasiga kirib, uni yupatishga uringandi. Umuman olganda, Son Xyunning bunday ehtirosi Janubiy Koreya aholisi o'rtasida yanada obro' orttirishiga olib keldi, hammada unga nisbatan muhabbat kuchaydiki, aslo kamaygani yo'q. «Muxlislarning Park Ji Sun va Son Xyun Minga nisbatan munosabati o'rtasiga katta farq bor, – deydi Li Sun Mo. – Shaxsan men Parkni hamisha tengsiz yulduz o'rnida ko'rganman. Deylik, u «Manchester Yunayted»da o'ynay boshlagach, yevrofutbol Janubiy koreyaliklar uchun go'yoki, milliy sportga aylandi-qo'ydi. Odamlar har qanday holatda ham futbolga vaqt ajratib, Park Ji Sunga astoydil muxlislik qilishdi. Oradan 5 yil o'tgach, Son Xyun ham debyut qildi, u o'smir yigitcha edi va muxlislar uni qadrdon ukadek e'zozlay boshlashdi. Haligacha Janubiy Koreyada ko'pchilik g'ururlanib gapiradi: «Bu – bizning Xyun». Odamlar uni shu qadar sevishlarining asosiy sabablaridan biri aynan yoshga bog'liq bo'lsa kerak. Mamlakatimizda bu holat madaniy bilimga taalluqlidir. Zero, koreyslar uchun g'urur katta ahamiyatga ega. Oddiy misol, «Tottenxem» stadioniga borsangiz yoki «shporlar» «Uembli»da o'ynaganlarida, tribunalarda Janubiy Koreya milliy bayrog'ining hilpirab turganiga ko'zingiz tushadi. Shu manzaraning o'zi butun mamlakat Son Xyun Min bilan faxrlanishidan dalolatdir. Ayniqsa, koreyalik bolalarda unga nisbatan mehr juda baland. Bundan tashqari, Son Xyun ancha kelishgan yigit va mutlaqo baxtli. Ko'plab qizlar hattoki, futbolchini «bo'lajak turmush o'rtog'i»dek ko'rib, aynan u bilan oila qurishni orzu qilishadi. Vaholanki, otasi allaqachon o'g'li futbolchilik faoliyati yakunlanganidan keyingina uylanishini aytgan».

***

Son Xyun hozirda Janubiy Koreyada mashhurlik bobida BTS pop guruhi bilan bemalol raqobatlashadi. «Shporlar»ning sobiq himoyachisi Kevin Vimmer ta'til vaqti Osiyo mamlakatida bo'lganida, bunga bevosita ishonch hosil qilgan: «Son Xyunning o'zi har doim shon-shuhratdan qochishga harakat qilgan, lekin London shimolida u bilan birga yashaydigan ota-onasi barchasini tushunishardi. Ular Janubiy Koreyaga yo'l olishimizdan oldin meni ogohlantirishdi: «O'g'limiz u yerda juda mashhur. Bunga tayyor tur». Son esa o'z odatiga ko'ra, boshqacha gapirdi: «Yo'q, uncha mashhur emasman».  Aytishim kerak, u hech qachon o'zini yulduzdek ko'rsatmagan, bunga intilmagan ham. Keyin Janubiy Koreyaga borib ko'rdimki, odamlar u yerda Son Xyun tufayli aqldan ozar ekanlar. Agar buni o'z ko'zingiz bilan ko'rmasangiz, tasavvur ham qilolmaysiz. Aeroportning o'zida shunchalik ko'p olomon to'plangan ediki, hayratdan yoqa ushladim. Jurnalistlarni aytmaysizmi? Qisqasi, uni xuddi rok yulduz kabi kutib olishdi. Keyin shahar bo'ylab sayrga chiqdik, hamma joyda Adidas va LG firmalarining ulkan ekranlarida Son Xyunning yirik brendlar modeli ko'rinishidagi suratlari… Restoranga kirganimizda, shosha-pisha ov­qatlandik, chunki odatdagidek, bemalol o'tirishning iloji yo'q. Kimdir Son Xyunni sezib qolsa, uni bir zumda hamma o'rab oladi. Ko'chada yurganimizda, u shlyapa yoki niqob kiyib olardi, boshqacha yo'li yo'q. Aks holda, odamlar Sonni darhol tanib, tezda o'rab olishadi. Bunday mashhurlikni ko'rib, beixtiyor o'ylab qoldim: «Xudoim, agar o'zim guvoh bo'lmaganimda, bunaqasiga aslo ishonmasdim». Eng muhimi, bizga yaqinlashgan biror kishi odobsizlik qilmadi. Buning sababi shuki, Son Xyun hech kimga qo'pol gapirmaydi, har doim ro'parasidagi kishiga tabassum ulashadi, samimiy tarzda suratga tushadi, garchi bu juda ko'p vaqt olsa ham».

SON XYuN MINNING ChO'QQI SARI YO'LI. Gazetamizning avvalgi sonlarida nafaqat Janubiy Koreya, balki butun Osiyo futbolining bugungi bosh yulduzi faoliyatiga bag'ishlangan katta maqola bilan tanisha boshlagandik. Demak, bugun Son Xyun Minning futboldagi yo'lida kuzatilgan «qalin» chizgilarga bag'ishlangan materialning yakuniy qismiga yetib keldik.

***

Son Xyun «Tottenxem»da o'yin masalasida o'sgani sayin uning mashhurligi ham oshib bormoqda. Koreyalik kamtar yigit «shporlar» safidagi ikkinchi mavsum barcha musobaqalar hisobidan 21ta gol urdi, jamoa esa ichki chempionatda 2-o'ringa chiqdi (oxirgi 54 yildagi eng yaxshi natija). Eng muhimi, Son Xyun o'sha mavsum boshida APLda oy laurea­tiga aylangan osiyolik birinchi futbolchi bo'ldi va keyinchalik aprelda ham yuksak e'tirofga erishib, bu borada «dubl» qayd etdi. Xullas, uning uchun Angliyadagi boshlang'ich muammolar butunlay ortda qoldi. Bu orada Janubiy Koreya termasining JCh-2018ga doir katta umidlari atigi 2ta o'yin natijasiga ko'ra, puchga chiqdi, lekin Son Xyunning o'zi Rossiya mundialini bezagan gollardan biriga mualliflik qildi. Faqat shunisi borki, koreyslar o'sha bahsda shvedlarga yutqazib qo'yishdi. Guruh bosqichi 3-turida esa, koreyaliklar chinakam xarakter ko'rsatib, Germaniya termasini nokautga uchratishdi – sensatsion g'alaba. Bu Son Xyun uchun milliy jamoa sardori sifatida birinchi oliy darajali o'yin edi.

***

Tinchlan, «Tottenxem»! Oradan yana 3 oy o'tgach, Son Xyun o'z mamlakatini shon-sharafga burkab, nihoyat, harbiy xizmat masalasini bir yoqli qildi. U keyinchalik Indoneziya poytaxti – Jakarta yaqinida joylashgan Sibinong shaharchasida kuzatilgan voqeani faoliyatidagi eng buyuk lahzalar sifatida ta'rifladi. Janubiy Koreya termasi Osiyo o'yinlari-2018 finalida yaponlarni yengdi va futbolchi shodligidan butun maydon bo'ylab yugurib chiqdi – u birdaniga 2ta nishonni urgandi. Ya'ni o'z mamlakatiga oltin medal tortiq etish barobarida 21 oylik harbiy majburiyat muddatini 3 haftalik tezkor o'quv-mashg'ulotlariga almashtirdi. Bunda «shporlar»ning mavsumning birinchi oyida uning ketishiga ruxsat berishlariga to'g'ri kelgandi, baribir. Tushunarliki, Son Xyun jamoadoshlariga xalqaro turnir qanchalik muhimligini ko'p bora tushuntirgan. «Yaqin do'stim Xvan Xi Chan JChda Son Xyun Min bilan birga o'ynagan, keyinchalik ular ko'p vaqtni birga o'tkazishgan, – deydi Osiyo o'yinlarida g'alaba qozongan jamoa tarkibiga 21 yoshida kirgan Xvan In Bum. – Bir safar do'stim bilan telefon orqali gaplashganimda, hozirgina saunadan chiqishganini aytdi va go'shakni Son Xyunga berdi. To'g'risi, oldin u bilan biror marta gaplashgan emasdim, shuning uchun biroz hayajonlandim. Son Xyun esa, buni sezib, gapni qisqa qildi: «Hoy, yaxshi formada tur, Osiyo o'yinlaridan g'olib sifatida qaytishimiz shart». Ayni shu dallasi menda katta ishonch tug'dirdi». Xvan In Bum shundan buyon Janubiy Koreya termasining doimiy futbolchisiga aylandi va Son Xyun mahoratiga ham, insoniy fazilatlariga ham bevosita guvoh bo'lyapti: «Terma jamoaga biror yosh futbolchi chaqirilsa, uning yoniga birinchi bo'lib aynan sardorimiz boradi. Bu ikkimizning birinchi uchrashuvimizni eslatadi – sardor meni juda iliq kutib olgan va dalda bergandi. Asosiysi, Son maydonga tushishdan oldin yigitlar bilan alohida gaplashib oladi. O'yin boshlangani hamoni hammamiz sardorning maydonda qanday harakatlanishini ko'rib, beixtiyor undan qolishmaslikka intilamiz».

***

Koreyalik futbolchi Osiyo o'yin­laridan qaytgach, muvaffaqiyatni yevrokuboklarda davom ettirdi. Deylik, ChL chorak finalida «Manchester Siti»ga qarshi kechgan javob o'yinida aynan Son Xyun Min barchasini 180 darajaga o'zgartirib yubordi – avvaliga maydondan chiqib ketadigandek ko'ringan to'pga ega chiqib, hisobni tenglashtirdi, yana 3 daqiqadan keyin esa, «Tottenxem»ning g'alaba golini urdi. «Qandaydir tartibsiz va tahlikali o'yin, lekin Son Xyun hech narsaga parvo qilmay, barchasini bir zumda tinchitdi, – degandi Rayan Meyson uchrashuvdan keyin FFT kanaliga bergan intervyusida. – Eng og'ir pallada ishni eng yuqori darajada bajarish juda qiyin. Bunaqasi faqat jahon darajasidagi futbolchilar qo'lidan keladi. Son Xyun ayni shu darajadagi ijrochi». Koreyalik jurnalist Li Son Mo esa, o'sha oqshom Etihad mehmonxonasida nimalar yuz berganini faxr bilan eslaydi: «Son Xyun birinchi golini urganida, «Siti» muxlislari bunga beparvo qarashdi: «Oh-ho, mayli, hammasi yaxshi, yo'llanma bizniki, baribir». Yana 3 daqiqadan keyin Son «shaharliklar» darvozabonini ikkinchi marta ojiz qoldirdi va mehmonxonaga butunlay sukunat cho'mdi. APLning eng yaxshi jamoasi, afsonaviy Xosep Gvardiola drujinasiga qarshi o'yinda koreyalik yigit qandaydir 3 daqiqada 2ta gol ursa-ya… Shunda bor ovozim bilan baqirishni o'yladim, ammo meni «Siti»ning minglab muxlislari o'rab turishgandi. Qisqasi, hamyurtim gollarini nishonlashdan cho'chidim: «Agar hozir qichqirsammi, o'lishim aniq… Janubiy Koreyaning eng buyuk futbolchisi kim? Parkmi Son yoki Cha Bom Kun? Bu masalada doimiy tortishuv bor. «Siti»ga qarshi o'sha o'yinga qadar shaxsan men Park Ji Sunni eng kuchli futbolchimiz sifatida ko'rsatardim. Ammo o'sha oqshom bu borada fikrimni o'zgartirdim: «Son Xyun endi Parkdan oldinda!» Fao­liyatim davomida Ji Sundan ko'p bora intervyu olganman, uning o'zi ham bir safar Son Xyun barchadan o'zib ketganini aytgandi. Hozir esa Minning Osiyo futbolining barcha zamonlardagi eng yaxshi futbolchisi ekanligiga shubham yo'q. Osiyolik buyuk futbolchilarni eslasangiz, ularning ko'plari ajo­yib jamoaviy ijrochi sifatida nom qozonishgan. Jumladan, Park Ji Sun ham. Ya'ni ular – bosh yulduzlar soyasida qolgan qahramonlar. Ammo Son Xyun mutlaqo boshqacha – uning bir o'zi o'yin borishini o'zgartirib yuborishi mumkin, raqibni yakka holda yengishga ham qodir. Asosiysi, Son osiyolik futbolchi ham dunyoda eng zo'rlar qatoriga chiqishi mumkinligini isbotlamoqda». «Shporlar» o'sha mavsum o'z tarixlarida birinchi marta ChL finaliga chiqishdi. Hal qiluvchi bahsning yana Son Xyun ko'z yoshlari bilan tugagani esa, boshqa masala. Madrid finalida «Liverpul» chindan ham, kuchli edi. O'sha yil yakunida Son Xyun Min yana bir natija qayd etdi – «Oltin to'p» sovrini so'rovida 22-o'rinni oldi. Bu Osiyo futboli vakillari uchun eng yuqori natijadir.

***

APLda esa hammasi boshqacha ssenariy bo'yicha tus oldi – kutilmagan yil. Har holda, tartibli o'ynashni xush ko'ruvchi koreys yigiti milliy chempionatning atigi 17ta uchrashuvida 3 marta qizil kartochka oldi. U avvaliga aprel oyida «Bornmut» vakili Jefferson Lermaga nisbatan qo'pollik ishlatgani tufayli maydondan chetlatildi, keyin noyabrda, yangi mavsum doirasida «Everton» bilan bo'lgan bahsda Andre Gomeshga jiddiy jarohat yetkazdi. Son bilan to'qnashuv oqibatida portugaliyalik yarim himoyachini maydondan shifokorlar zambilida olib chiqib ketishdi. Ushbu dahshatli holat koreyalik futbolchiga qattiq ta'sir qildi – u yig'lab yubordi va raqibidan zudlik bilan kechirim so'radi. E'tiborli tomoni, APL keyinchalik to'qnashuvni ko'rib chiqib, Son Xyun diskvalifikatsiyasini bekor qildi – uning harakati «qizil»ga tortmasdi. Yana bir oydan keyin qahramonimiz «Chelsi» himoyachisi Antonio Ryudiger qovur­g'asiga tepgani uchun chetlatildi. Son bunisida chindan ham, noo'rin harakatlanganini tan oldi. «Menimcha, hammasi shunchaki, omadsiz vaziyatlar oqibati. Son Xyun aslida qizil kartochka darajasida qo'pollik ishlatadigan futbolchi emas», – deydi Kevin Vimmer. To'g'ri, koreys futbolchisi Leverkuzenda ham bir safar tajovuzkor harakati uchun maydondan chetlatilgandi. «O'sha yigit meni ikki marta tepdi, keyin o'rnimdan turib, uni turtib yubordim, – deya o'sha voqeani eslagandi Son Xyun. – Hamisha muloyimlik bilan tabassum ulashish yaxshi, lekin maydonda faqat g'alaba qozonishni istayman». Mag'lublikni tan olmaydigan futbolchi shunday xarakteri bilan Joze Mourino ishonchini qozonib, uning qo'l ostida juda yaxshi o'ynadi. Portugaliyalik mutaxassis «Tottenxem» bosh murabbiyi sifatida 2019 yilning dekabri, ya'ni Son Xyun qizil kartochka olgan «Chelsi»ga qarshi bahsdan biroz oldin ish boshladi. «Benazir» Janubiy Koreya faxrini o'sha oyning o'zida boshqacha ta'rifladi: «Sonaldo Nazario». Gap shundaki, Son «Bernli» bilan o'yinda to'pni o'z jamoasi jarima maydoni yaqinida qabul qilib olgancha fantastik yurishni amalga oshirib, fantastik gol urdi. Darvoqe, yakunda o'sha harakat Son Xyunga FIFA tomonidan yilning eng chiroyli goli muallifiga ajratilgan mukofotni olib keldi. «Uning Pushkash nomidagi sovrin sohibiga aylanganidan bag'oyat xursand bo'ldim. Son chindan ham, o'ta go'zal gol urdi. U bunga to'liq loyiq, muvaffaqiyat yo'lida nechog'li ko'p ishlaganini yaxshi bilaman» – bu Son bilan «Gamburg»da birga o'ynagan va haligacha uning o'yinlarini kuzatib kelayotgan braziliyalik Ze Robertoning e'tirofi.

***

«Bernli»ga qarshi kechgan o'sha sehrli uchrashuv vaqtidan chamasi 2 oy o'tgach, Son Xyun «Aston Villa» bilan bahsda qo'lini sindirib oldi, lekin jarohat jiddiyligini sezmay, 89 daqiqa to'p surib, 2ta gol urdi. Biroq shu muammo ortidan chetga chiqishiga to'g'ri keldi. Boz ustiga, bu vaqt­da klubning yana bir yetakchisi Garri Keyn ham safda emasdi. Oqibatda «shporlar» ChLda «RB Leypsig»ga yo'l bo'shatishdi va APLning navbatdagi 3ta o'yinida atigi 1 ochko olishdi. Koronavirus chempionatni to'xtatib qo'ygan pallada esa, barcha futbolchilar oddiy shakldagi individual mash­g'ulotlar bilan cheklangan bo'lsalar, kutilmagan tanaffus Son Xyunga qo'shimcha imkoniyat yaratdi. Ya'ni Osiyo o'yinlaridan keyin 3 haftalik harbiy xizmatga bo'sh vaqt topolmayotgan futbolchi yuzaga kelgan vaziyatdan unumli foydalandi. Xullas, Son Xyun aprelda, 28 yoshga to'lishidan 3 oy oldin Jejuga yo'l oldi. Millat faxri maxsus kurs yakunida hattoki, otish bo'yicha mukofot ham oldi. Faqat bu safar to'p emas, balki o'q otish ortidan. «Bu juda g'alati – kuladi Vimmer. – O'zi har jihatda birinchi bo'lish aynan Songa xos. Qolaversa, u hamisha nishonni to'g'ri olardi! Nihoyat, barchasini uddalagani va harbiy ishlar bilan bog'liq masalani hal etgani ayni muddao. Harqalay, endi bor e'tiborini futbolga burishi mumkin. Bilaman, Son Xyunni aynan harbiy xizmat majburiyati ko'p o'ylantirgan. Chunki u armiyaga qachon borishi va xizmat qancha davom etishini bilmasdi». Li So Moning aytishicha, armiya safari futbolchining faqat shaxsiy hayoti emas, balki sportdagi faoliyati uchun ham muhim bo'ldi: «Ishonchim komil, harbiy ko'nikma unga katta yordam beradi. Majburiyatdan qutulish erkinlik tuyg'usi barobarida mag'rurlik hissini uyg'otishi turgan gap. Endi Son Xyun bemalol baralla gapirishga haqli. Shaxsan o'zim ham Janubiy Koreya fuqarosi sifatida yigitlik burchimni ado etganman va armiyada xizmat qilish qanday g'urur bag'ishlashini yaxshi bilaman. Qiziq, APLdagi necha nafar futbolchi harbiy tayyorgarlikni o'tagan? Eshitishimcha, Salohni Misr armiyasiga chaqirishgan, ammo u borishga majbur emasdi. Ehtimolki, Son faoliyati o'rtasida xizmatni o'tagan yagona futbolchidir».

***

Mourinoni qutqargan o'yinchi. Mavsumning cho'zilib ketgani Son Xyunga imkon berdi – u xizmatdan qaytib, o'yinlarda yana ishtirok etishga ulgurdi. Aniqroq aytsak, finish marrasiga 4ta tur qolgan pallada «shporlar» turnir jadvalida atigi 10-o'rinni egallab turgandilar. Keyin jamoa Son Xyunning goli yordami bilan «Arsenal»dan 3 ochko tortib oldi. Yakunda «Tottenxem» yevrokuboklar zonasiga kirdi – 6-o'rin. Son Xyun esa qatorasiga ikkinchi mavsum «Tottenxem»ning eng yaxshi futbolchisi sifatida tan olindi. «Arsenal» darvozasiga urilgan o'sha gol butun jamoa kayfiyatini o'zgartirdi, – deydi Li So Mo. – O'ylaymanki, Son shu orqali Mou­rinoning iste'foga chiqishdan qutqarib qoldi. Chunki Jozening birinchi mavsumida «shporlar» uncha ishonchli o'ynashmadi va uning ishdan bo'shatilishi ehtimoli haqida mish-mishlar ham tarqalgandi». Mou­rinoning o'zi Son Xyun o'yinini maqtab, hattoki, «Ever­ton»ga qarshi o'yin payti Ugo Loris bilan yuzaga kelgan kelishmovchilikda koreyalik yigit yuqori jangovar ruhini namoyish etganini ta'kidladi.

***

Mavsum-2020-2021 aynan Son Xyunning faolligi tufayli «Tottenxem» uchun ijobiy ruhda boshlandi. «Shporlar» noyabr – dekabr oralig'ida APL turnir jadvalini boshqarib turishdi. Yanvarda esa koreys yigiti «Brentford» bilan uy uchrashuvida klub libosidagi 101-golini nishonlab, uni Liga kubogi finaliga yetakladi. «Tottenxem» 2008 yildan buyon ichki turnirlarda sovrin yutishga bu qadar yaqin kelgan emasdi. Qolaversa, Sonning o'zi mavsumdagi gollari sonini 16taga yetkazdi (bu butun faoliyatidagi eng yuqori ko'rsatkichidan atigi 5ta kam edi). Koreys futbolchisining har ikki oyog'i bilan birdek zarba yo'llash qobiliyati kuchli ekanligi ham tasdiqlandi. Statistik ma'lumotlar shuni ko'rsatmoqdaki, u oxirgi 5 yilda zaifroq oyog'i bilan APLdagi eng kuchli hujumchilarga nisbatan ko'proq gol urgan. Samarali uzatmalar me'yori ham shu darajada bo'ldi: 14ta. Fevralning oxiriga kelib, Garri Keyn va Son Xyunning dahshatli bog'lami yangi pog'onaga ko'tarildi. Deylik, Keyn sentyabr oyida «Sautgempton» darvozasini 4 bora ishg'ol qilgan bo'lsa, ularning barchasiga Son assistentlik qildi. «Ikkisining kombinatsion harakati darhaqiqat, dahshatli, – degandi mavsum yakunida «Tottenxem»ni boshqargan Rayan Meyson. – Agar jamoangizda Garri va Son bo'lishsa, har qanday raqibni mag'lub etishingiz mumkin – ularga gap yo'q. Ayniqsa, Xyun Min mavsum davomida betakror gollar urdiki, ularga qarab lol qolasiz. Koreysning ustun tomoni – tezlik va ijro sifati».

***

Son Xyun Min – APLning eng kuchli futbolchilaridan biri va harbiy mukofot sohibi. Savol, u bajarolmaydigan ish bormi? «Son taom tayyorlashda no'noq, – deydi Vimmer bu borada kulib. – Bir safar Kayl Uoker va Ben Devis bilan birga Janubiy Koreyaga bordik, mahalliy TV mehmoni bo'ldik. Chekimizga koreyscha taom pishirish tushdi, yakunda maxsus hakamlar ishimizga baho berishdi. Aslida men taom pishirishda juda yomonman, lekin Son Xyundan yaxshiroq ball oldim». Koreyalik yigit shuningdek, hali «Tottenxem» futbolchilar uchun sevimli mashg'ulot – kriketni ham o'zlashtirgani yo'q. Yana golf o'ynashni ham bilmaydi: «Koptokni iloji boricha uzoqqa otasiz, keyin uni qidirasiz – bu zerikarli». Futbol – Son Xyun uchun mangu muhabbat, vaholanki, u sezilarli natijalarga erishganiga qaramay, klub darajasida hali kubok yutgani yo'q. «Tottenxem»da qandaydir sovrin yutish – bu Son uchun katta maqsad, – deydi Vimmer. – U bilan so'nggi marta gaplashganimda, oxirgi 5 yil ichida yuqori darajada o'ynagani, mavsumdan mavsumga kuchayib borayotganini qadrlashi kerakligini ta'kidladim. Ammo o'zi hali to'liq xursand emas – yanada yuksalishni, yanada takomillashishni xohlaydi. Menimcha, Son ertami-kech, kubok yutadi, baribir. Hozircha unga faqat shu narcha etishmayapti». Agar Son Xyun buni uddalasa, barcha davrlarning osiyolik eng yaxshi futbolchisi maqomini mustahkamlashi tayin. «Fikrimcha, Janubiy Koreyada yaqin 100 yil ichida Son Xyun kabi futbolchi chiqmasa kerak, – deydi «Tottenxem» yulduzi bilan deyarli 15 yil oldin birga shug'ullangan va uning zarbalaridan o'zini olib qochgan Von Chan Yon. U Son Xyun Minning naqadar kuchli ekanligini boshidayoq bilgandi. Endi buni butun dunyo biladi.

 

H.ATAVULLAYEV tayyorladi

Manba

Do'stlaringizga bilan baham ko'ring