OK-2023 saralashi bilan cheklanamiz va boshqa “gap”lar haqida

O'zbekiston termasini endi Osiyo kubogi-2023 saralashi kutmoqda. Jamoamiz qur'a tashlash jarayonida Iordaniya, Bahrayn, Qirg'iziston, Falastin va Hindiston jamoalari bilan birga 1-savatchadan joy oldi. Go'yoki, 10-sinf o'quvchisi bolakaylar bilan qumloqqa o'ynagani kelgandek tasavvur uyg'onmoqda. Ammo kelgusi yil uchun qismatimiz shu…

***

– OFK Osiyo kubogi-2023 saralash turniri formatini o'zgartirdi. Unga ko'ra, ikki raundli tizimdan voz kechildi. Aytishlaricha, saralash 2022 yilning martida boshlanadi, demak, O'zbekiston termasi rasmiy musobaqalar oldidan 9 oy tanaffus oladi. Albatta, o'yinlarning martga ko'chirilishi va «pley-off» formatining qisqartirilishi, katta ehtimolki, pandemiya oqibatlari bilan bog'liq.

***

– Rasmiy ma'lumot oldik. Demak, Osiyo kubogi-2023 saralashi doirasidagi «pley-off» o'yinlari 7 sentyabr va 12 oktyabr kunlari bo'lib o'tadi. Unda 4ta jamoa – Indoneziya, Kambodja, Xitoy Taypeyi va Guam termalari qatnashadi. Asosiy raund esa, 2022 yilning 1 fevralida boshlanib, 27 sentyabrda yakunlanadi. 6ta guruhda 4tadan jamoa «uy-safar» tizimida bahslashadi. Garchi OFK har bir guruhdan 2tadan jamoa final bosqichiga chiqishini ma'lum qilgan bo'lsada, aslida bu noto'g'ri. Chunki 11ta yo'llanma qolgan: JCh-2022 saralashi uchinchi raundida qatnashadigan 12ta jamoa va Qatar termasi Osiyo kubogi yo'llanmasiga ega chiqib ulgurgan.

***

– «Blek Mirror» ma'lumotida ko'rsatilishicha, Oston O'runovning shartnomasida «Futbolchi 1 mln. yevrodan qimmatroqqa sotilgan taqdirda summaning 25 foizi uning o'ziga berilishi» haqida band bor ekan. Oston va uni shunday shartnoma tuzishga o'rgatganlarga tasanno. O'runovning shu 25 foizni qo'lga kiritishiga shubham bor, lekin 25 foiz summaning 25 foizi ham yomon emas…

***

– Aytishlaricha, O'zbekiston chempionati 10-turi doirasidagi «Paxtakor» – «So'g'diyona» uchrashuvida texnik sabablarga ko'ra, VAR ishlamagan. Internetda bu haqda hech nima yozilmadi. Balki hamma Yevro-2020 yoki O'FA Kongressi muhokamasi bilan banddir.

 

Alisher NIKIMBAYEV, Futbolium»

Manba

Do'stlaringizga bilan baham ko'ring