Hakam bosimga qarshi borib bo'lsa-da, xolis qaror chiqara oldi. Buning uchun uni maqtash kerak!

Kechagi “Navbahor” – “Paxtakor” o'yinidan keyingi janjallar, mezbon muxlislarning noroziligini tabiiy deb bilsam-da, tushuna olmayman, qo'shilmayman. O'sha palladagi hissiyotlarni tushunishga urinish ham ortiqcha, ammo xolis aql bilan, o'yinning ertasiga, hakamning “Paxtakor”ga yon bosgani, xato qilgani, mezbonlarni sindirgani haqidagi gaplar o'rinsiz. Hatto prezidentga murojaat qilayotgan muxlislar ham chiqyapti.

Umuman, penalti o'yin oxirida bo'ladimi, boshidami, kayfiyatga qay darajada ta'sir qiladi, bu tarzda fikrlash xato. Hakam uchun qoida buzilishining borligi yoki yo'qligi muhim. To'g'ri, statistikada so'nggi daqiqalarda penalti belgilanishi kam. Sababi, o'sha pallada hakamlar yanada extiyotkorroq bo'lishadi. Xato qilinsa, bu qaror o'yin taqdirini hal qilishini, narigi taraf vaziyatni o'nglash, masalan hisobni tenglashtirishga vaqti bo'lmasligini yaxshi tushunishadi. Shuning uchun ko'pincha, bosimdan qochishadi.

Lekin kecha VAR bor edi. Menimcha, takroriy vaziyat ko'rsatdi – kontakt ham, penalti ham bor edi. Hakam vaziyatni aniq ko'rdi va baholadi. Hakam qaror berishda “Paxtakor”ning bosimi ostida emasdi, nazarimda. Hozirgi “Paxtakor”ni men har bir o'yinda hakamlarga bosim qiladigan bir necha yil oldingisiga qiyoslay olmayman. Shundoq ham, boshqalardan ancha kuchli jamoa, Namanganda, mavsum boshida ochko yo'qotish ular uchun u qadar fojea ham bo'lmasdi.

Aksincha, “Navbahor” va uning muxlislarining bosimi ostida edi. Agar hakam penalti belgilamaganda, nazarimda, “Paxtakor” hech qanday janjal chiqarmas, 1:1 hisobida tinchgina o'yin yakunlanardi. So'nggi daqiqalardagi penalti esa, mezbonlar tomonidan katta noroziliklarga sabab bo'lishi ma'lum edi.

Ya'ni hakam bosimga qarshi borib bo'lsa-da, xolis qaror chiqara oldi. Buning uchun uni maqtash kerak.

Aslanov bilan futbol

Do'stlaringizga bilan baham ko'ring