Superliga 5-tur prevyu. “Navbahor” – “Paxtakor”

Coca Cola Superliga 5-turi doirasida “Navbahor” o'z maydonida Toshkentning  “Paxtakor”  klubini qabul qiladi.

Superliga (oliy liga)mizning muntazam ishtirokchisi bo'lgan mazkur klublarning o'zaro uchrashuvlari tarixiga nazar tashlaydigan bo'lsak, jamoalar hozirgacha 60 marta o'zaro ro'baro' kelishgan. O'zaro o'yinlar bo'yicha ustunlik  poytaxtliklar tarafida. O'tkazilgan bahslarning 37tasida  “sherlar” zafar quchishgan bo'lsa, 13ta o'yinda “lochinlar” g'alaba qozonishgan, 10 ta uchrashuvda esa durang qayd etilgan. “Paxtakor” “Navbahor” darvozasiga 101 ta to'p kiritib, o'z darvozasidan 47 ta to'p o'tkazib yuborgan.

O'zaro o'yinlarda “sherlar” 121, “lochinlar” esa 49 ochkoni qo'lga kiritishgan.

Ushbu  jamoalarning o'zaro o'yinlari tarixida qayd etilgan eng yirik hisob – 7:0. Ushbu hisob 2009 yili Toshkentda bo'lib o'tgan uchrashuvda qayd etilib, unda “Paxtakor” zafar quchgandi.

Ayni paytgacha Namanganda bo'lib o'tgan 30 ta bahsning 12 tasida “lochinlar” g'alaba qozonishgan bo'lsa, yana 12 tasida toshkentliklar zafar quchishgan, 6 ta o'yinda esa durang qayd etilgan.

“Navbahor” o'z maydonidagi o'yinlarda “Paxtakor” darvozasiga 28ta gol urib, o'z darvozasidan 34ta to'p o'tkazib yuborgan.

O'tgan yili Namanganda bo'lib o'tgan bahsda durang – 1:1 hisobi qayd etilgandi. O'sha o'yinda “lochinlar”ning goliga Azizbek Turg'unboyev, “sherlar”nikiga esa Igor Sergeev mualliflik qilishgandi.

Ta'kidlash joizki, Turg'unboyev ayni paytda “Paxtakor” sharafini himoya qilmoqda.

Eslatib o'tamiz, “Navbahor” – “Paxtakor” o'yini bugun 7 aprel kuni Namangandagi “Markaziy” o'yingohda soat 18:30 da start oladi.

“Navbahor” PFK matbuot xizmati. 

Do'stlaringizga bilan baham ko'ring