Mashg'ulotda uxlab qolgan sinor Rokko

Bizning zamonamizda ustoz va murabbiylarga bo'lgan hurmat borgan sari kam uchraydigan holatga aylanib bormoqda. 60-yillardagi «Milan» jamoasida esa bu borada muammo bo'lmagan. Jovanni Trapattoni xotira kitobida futbolchilik faoliyatidagi qiziq holatni eslaydi.

«Mashg'ulotlardan birida murabbiyimiz Nereo Rokko «Maydonni aylanib yuguringlar, qachon tugatishni o'zim aytaman», deb shlyapasini boshiga qo'ndirdi-da, daraxt soyasiga yonboshladi. 10, 20, 30 daqiqa o'tdi hamki murabbiy jim edi. 40 daqiqa o'tgach, jamoa sardori Chezare Maldini murabbiyga ajablanarli qarab qo'yishga jur'at qildi. U esa daraxt soyasida o'tirishda davom etardi.

«Nahotki uxlab qolgan bo'lsa», deb o'ylay boshladik. «Qo'ysanglarchi, u bizni sinamoqchi», dedi ba'zilar.

Navbatdagi aylanishdan keyin Maldini yigitlarni to'xtatib, murabbiyning oldiga borishga jur'at qildi: «Sinor Rokko, sinor Rokko», dedi sardor, biroq hech qanday javob bo'lmadi. Maldini murabbiyning shlyapasini yechdi va u qattiq uxlab yotganini ko'rdik.

«Jin ursin, uyqu bosibdi», dedi murabbiy va bizga qarab kuldi», deb xotirlaydi Trapattoni.

 

TRIBUNA rasmiy sahifalari

Do'stlaringizga bilan baham ko'ring